لبنان بعد باسيل.. هذا ما قاله نواب "لبنان القوي" للحريري

ردّت مجموعة من نواب تكتل "لبنان القوي" على خطاب الرئيس سعد الحريري في ذكرى 14 شباط.

فمن جهته، غرد النائب سيزار أبي خليل عبر حسابه على "تويتر" قائلاً: "مين حكم البلد بثلاثين سنة وعمل سياساته المالية والاقتصادية؟ 83% للحريري وحلفائه و17% لأخصام الحريري. هيك بيحسبوا مين حكم البلد مش مين أخذ أكتر وزارة الطاقة".

بدوره، توجه النائب نقولا صحناوي، إلى الرئيس سعد الحريري من دون أن يسميه، في تغريدة عبر "تويتر" قال فيها: "عم تحرض المسيحيين على بعضن وتحكي عن اتفاق معراب؟، نحنا يلي ما قبلنا معك تطلع أول حكومة إلا ما ياخدوا القوات متل ما بدن، ونحنا يلي قبلنا إنو ياخدوا بثاني حكومة 4 بدل 3. يللي مش قادر تتحملو أنت انو معنا القصة انتقلت من وزير للقوات بالـ2005 ل15 وزير مسيحي على 15 بالـ2018".

إلى ذلك، رد عضو تكتل "لبنان القوي" النائب جورج عطاالله على الحريري من دون أن يسميه، بتغريدة عبر "تويتر" جاء فيها: "يا شيخ يا شيخ يا شيخ، يللي بدو يلغي الحريرية السياسية:

 1- ما بيرفض بل2017 استقالتك من السعودية وبيبرم الدني تترجع رئيس حكومة.

 2- ما بيرفض بل 2019 استقالتك وبيطلب منك ترجع تشكل الحكومة الجديدة.

 3- ما بيعتبرك المكون الأساسي بطايفتك وبيتمسك فيك ميثاقيا وما بيقبل حدا يمس بحضورك وصلاحياتك.

بس إذا انت عم تلغي حالك بإدائك وشغلك وكلامك ومواقفك، شو خصنا نحنا؟".

من جانبه، رد الوزير السابق غسان عطالله على الحريري من دون أن يسميه، بتغريدة عبر "تويتر" جاء فيها: "طلعت معك قبرشمون حرب إلغاء للاشتراكي وإنت عارف مين قوص ومين حاول يلغي الثاني جسديا ومين بالمقابل استوعب ليخلص البلد. من الأول قلنالك ما توقف الحكومة ولا يوم وأنت بضعفك أخرتها 60 يوم، هيك إنت وهيك خطة المهجرين معك وهيك الشغل معك ما بيوصل لمحل. أجمل ما في الخطاب أن الوفاء عملة نادرة".

كذلك، علق عضو تكتل "لبنان القوي" النائب سليم خوري على سعد الحريري بتغريدة عبر "تويتر" جاء فيها: "الخطاب في مكان، أما الحقيقة فهي في مكان آخر".

ومع هذا، رد النائب روجيه عازار على الحريري من دون أن يسميه، بتغريدة عبر "تويتر" جاء فيها: "اللي بدو يلغي الآخر ما بخلصك من الأسر ولا بصر تكون رئيس حكومة ولا بيعمل قانون بأمن تمثيل الكل حسب حجمو الواقعي ولا بكون هوي أساس كل التفاهمات بالبلد".

المصدر:  لبنان 24